«Müqavimət göstərənlərin ayağını bağlayıb vurmaq lazımdır»

İddia ərizəsində göstərilir ki, avqustun 26-da təqribən saat 9-30-da Şıxov çimərliyində yerləşən “Dostluq” istirahət güşəsində R. Qasımov, A.Abdulov və başqaları ( cəmi 7 nəfər) Səbail RPİ 8-ci polis bölməsinin PPX-nin əməkdaşları tərəfindən saxlanılaraq məcburi qaydada Səabil RPİ-nin 8-ci Polis Bölməsinə aparılıblar.
Polis bölməsində onları növbətçi Tərlan adlı işçinin yatdığı ikinci mərtəbəki otağında yerləşdiriblər. Orda formada və mülki geyimdə başqa polis işçiləri olub (Qoşqar və başqaları).
Saxlanan şəxslər bölmədə yerləşdirildikdən az sonra otağa 8-ci polis Bölməsinin rəis müavini, mayor Namiq Ağalarov daxil olub: «Onlar gətirilənləri nalayiq sözlərlə təhqir etməyə, saqqalından dartmağa, polisə müqavimət, narkotik və ya silah saxlanılmasına görə həbsə salmaqla hədələməyə başladı. Namiq Ağalarovun göstərişilə bütün saxlanınanların bir neçə dəfə şəkilləri çəkilidi və barmaq izləri götürüldü. Bundan sonra Namiq Ağalarov dəlləyi çağıraraq gətirilmiş şəxslərin hamısının saqqalarını qırxmağı əmr etdi. O, bildirdi ki, əgər saxlanılan şəxslər müqavimtə göstərsələr onların ayaqlarını bağlamaq və vurmaq lazımdır”.

«Rəis müavini bizi butulka ilə hədələdi»

Saxlandıqları müddət ərzində mayor Namiq Ağalarovun onlara  ardıcıl və tükürpədici işgəncələr verdiyini qeyd edən iddiaçılar yazır: “O, saxlanılan şəxslərə nalayiq sözlər deyib, qarınlarına və böyürlərinə zərbələr endirir, əl-qol atır, butulka ilə hədələyir, deyirdi ki, saxlanılan şəxslərin cinsiyyət orqanlarını kəsmək lazımdır. Rəis müavini dini və saxlanılan şəxslərin qohumlarını təhqir edirdi. Dindarların şəkillərini çəkdikdən sonra Namiq Ağalarovun göstərişi ilə dəllək hamısının saqqalını qırxdı”.

«BMCQM-da bizdən qan nümunələri götürdülər»

Dindarların iddiasına görə, bu məcara polis şöbəsində baş verənlərlə yekunlaşmayıb. İddiada göstərilir ki, onlar 8-ci polis bölməsində 14 saata qədər saxlandıqdan sonra, Post Patrul Xidmətinin maşınlarında Baş Mütəşəkkil Cinayətkarlıqla Mübarizə İdarəsinə aparılıblar.
Bu idarədə, onlardan məcburi qaydada qan, saç nümunələri, barmaq izlir götürülüb. 17 avqust 2008-ci il tarixində harada olmaları barədə izahat alınıb, sonra isə sərbəst buraxılıblar.
Saxlanan hər iki şəxs iddia edir ki, Bakı şəhəri, Səbail RPİ-nin 8-ci polis şöbəsinin işçilərinin göstərilmiş hərəkətləri nəticəsində onların Azərbaycan Respublikası Konstitusiyası və İnsan hüquqları üzrə Avropa Konvensiyası ilə təminat verilmiş hüquq və azadlıqları pozulub: “Hesab edirik ki, Bakı şəhər, Səbail RPİ-nin 8-ci polis bölməsinin əməkdaşları tərəfindən Konstitusiyanın 25, 26, 28, 31, 32, 47, 48 və 49-cu maddəsinin, eləcə də İnsan hüquqları üzrə Avropa Konvensiyasının 3, 5, 9, 11, 14-cü maddələrinin tələbləri pozulmuşdur.

«Həqiqət ədalətli məhkəmədə üzə çıxa bilər»

R.V. Qasımov və A.Y. Abdulov qanunsuz, hər hansı bir əsas olmadan saxlanılmış, azadlıqdan məhrum edilmiş, şəxsi toxunulmazlıq hüquqları pozulmuş, dini baxışlarına görə işgəncələrə və ayrı-seçkiliyə məruz qalmışlar. Saxlanılan zaman hüquqi müdafiə vasitələrindən istifadə hüququndan məhrum olmuşlar. R.V. Qasımov və A.Y. Abdulovdan müqayisəli tədqiqat üçün nümunələr qüvvədə olan qanunvericiliyə və «Dövlət daktiloskopiya qeydiyyatı haqqında» Azərbaycan Respublikası Qanununa zidd olaraq götürülmüşdür”.
Şübhəsiz ki, bu, həmin şəxslərin ərizələrində göstərdikləri iddialardır. Əsl həqiqət isə ədalətli məhkəmə araşdırmasından sonra bəlli ola bilər.

Natiq