Rəsulullah (s), rüşvət verənə və rüşvət alana lənət etdi !!!
00:13
Ey insanlar!..
Nəfsimə və sizə ALLAH`dan layiqincə qorxmağı tövsiyə edirəm. Ondan
layiqincə qorxan nə xoşbəxtdir! Gizli və aşkar hallarında Ondan
qorxanın qazancı nə gözəl qazanc, daima Onun itaətində olan və Ona
asilik etməyənin qurtuluşu nə gözəl qurtuluşdur! İslam
qardaşları!.. İslamın müəyyən edilmiş əsaslarından biri də, idarə edən
və idarə edilən arasında yardımlaşmanın vacibliyi və ümmətin bütününə
xeyir verəcək şeylərlə əlagəli məsuliyyətin fərz olmasıdır. Bu,
cəmiyyətin xeyirlərini qoruyur, əmin-amanlıq və rahatlığı zəmanət
altına alır. Doğruluq, səmimiyyət və fədakarlıq ilə UCA ALLAH`ın
haqlarını və hökmlərini qoruyaraq, hər kəs məsuliyyətini yerinə
yetirmədikcə və vəzifəsinə bağlı qalmadıqca, ümmətin heç bir işi doğru
olmaz. Buna görə İslam şəriəti, məsuliyyətin məqsədlərini qoruyan,
azmağın və pisliyin səbəblərini ondan uzaqlaşdıran bütün əsas ünsürləri
gətirmişdir. Bu ünsürlərdən biri də, rüşvət alma, rüşvət vermə və
rüşvətə vasitəçilik etmə günahlarının qətiyyətlə yasaqlanması və
şiddətlə qınanmasıdır. ALLAH`ın qulları!.. Rüşvət, RƏBB`in qəzəbinə yol açar və əzaba səbəb olur. Abdullah ibn Amrdan (r.a) belə dediyi rəvayət edilir:
“Rəsulullah (sav), rüşvət verənə və rüşvət alana lənət etdi.” (ət-Tirmizi. ət-Tirmizi hədisin “həsən-səhih” olduğunu bildirir)
Sevbandan (r.a) belə dediyi rəvayət edilir: “Rəsulullah (sav) rüşvət verənə, rüşvət alana və rüşvətə vasitəçilik edənə lənət etdi.” (Əhməd ibn Hənbəl)
Bu açıq dəlillərə və ət-Təbəraninin yaxşı bir isnadla Rəsulullahdan (sav) rəvayət etdiyi “Rüşvət
verən də, rüşvət alan da atəşdədir” hədisinə əsaslanaraq İmam əz-Zəhəbi
və digər elm əhli, “Rüşvət, böyük günahlardan biridir” demişdirlər. Ey müsəlmanlar!.. Rüşvət, malları batil yolla və haram olaraq yeməkdir. UCA ALLAH belə buyurur: “Bir-birinizin
mallarını haqqınız olmadığı halda yeməyin! Xalqın malının bir qismini
(onun sizə haram olduğunu) bilə-bilə günah yolu ilə yeməyiniz üçün onu
(malınızı) hakimlərə (rüşvət) verməyin!” (əl-Bəqərə surəsi, 2/188)
UCA ALLAH yəhudilər haqqında belə buyurur: “Onlar yalana qulaq asanlar və haram yeyənlərdir.” (əl-Maidə surəsi, 5/42) Ömərdən (r.a) belə dediyi rəvayət edilir: “İnsanların yediyi iki pis qazanc qapısı vardır: Rüşvət və zinakar qadının zinadan qazandığı.” İman
qardaşları!.. Rüşvət, zərərli və təhlükəli bir xəstəlikdir. Fərdlər
üçün təhlükəsi və cəmiyyət üçün pisliyi böyükdür. Rüşvətə bulaşan
şəxsin mütləq sağlamlığından, vaxtından, ruzisindən, ailəsindən və
ömründən bərəkət qaldırılır. Rüşvətə bulaşan şəxsin mütləq duası qəbul
olunmaz, insanlığı yox olar, əxlaqı pozular, utanma duyğusu itər və
qazanc mənbəyi çirkin olar. Hədisi şərifdə, Rəsulullah (sav) belə buyurur:
“Haqsız
qazancla bitən hər ət, atəşə daha layiqdir.” Deyilir ki: “Haqsız qazanc
nədir?” O belə buyurur: “Hökm vermədə rüşvət almaqdır.” (İbn Cərir)
Rüşvət,
cəmiyyətlərin yox olmasına və zərərə düçar olmasına səbəb olar,
vəziyyətlərini pozar. Cəmiyyətlərdə, zülmün yayılmasına yol açar.
Bundan başqa, rüşvətin yayıldığı bir cəmiyyətdə şərəf, izzət və fəzilət
yox olur və onların yerinə, alçaqlıq, kin və nifrət hakim olur. Rüşvət
bir ümmətdə olarsa, mütləq o ümmətdə nəsihətin yerini saxtakarlıq,
əmanətin yerini xainlik, ədalətin yerini zülm və əmin-amanlığın yerini
qorxu alar. Cəmiyyətdə rüşvət; alçaqlığa və pozğunluğa, nəfslərin
şəhvətlərinin sərbəst qalmasına, oğurluğun və saxtakarlığın
yayılmasına, vəzifədən sui-istifadəyə və dələduzluğa çağırmaqdır. O
zaman, cəmiyyətin maraqları zərərə düçar olar. Cəmiyyətdə pislik və
zülm hakim olar. Aralarında səfillik, kasıbçılıq və bədbəxtçilik
yayılar.
Rəsulullah (sav) belə buyurur:
“İçində rüşvət ortaya çıxan hər bir qövm, qorxu ilə müsibətə düçar edilir.” (Əhməd ibn Hənbəl)
Buna bənzər başqa rəvayətlər də vardır. Ey
müsəlmanlar!.. Rüşvət həqiqətdə; insanın, ona halal olmayan bir şeyi
əldə etmək üçün vəzifəli bir şəxsə ödədiyi hər şeydir. Rüşvət, bir çox
şəkildə olur. Ən böyüyü, bir haqqın pozulması, bir batilin haqlı
edilməsi və ya bir şəxsə zülm etmək üçün veriləndir. Vəzifəli şəxsin
əslində qarşılıqsız etməli olduğu bir işi etməsi üçün pul və ya digər
şey alması da rüşvət şəkillərindən biridir. Rüşvət verənin, ona aid
olmayan bir şeyin ona verilməsi üçün və ya yerinə yetirməli olduğu bir
haqqı yerinə yetirməmək üçün rüşvət verməsi və yaxud özü kimi haqq
edənlərin bitərəf etmək üçün rüşvət verməsi də rüşvətin müxtəlif
şəkillərindəndir. Ey müsəlmanlar!.. İslamda rüşvət, hansı şəkildə
olsa da və nə adla adlandırılsa da haramdır. İstər hədiyə, istər
mükafat və istərsə də hörmət deyilsin, hall eynidir. İsimlər
həqiqətləri dəyişdirməz. Sözlərə deyil, həqiqətlərə baxılır. Şəriət
tərəfindən müəyyən edilən qanunlardan biri də, vəzifəli şəxslərin
hədiyə almasının əmanətə xəyanət qəbul edilməsidir. Burada nəzərdə
tutulan, idarəçilikdə yer alan hər bir vəzifəli şəxsdir. Rəhbərləri,
yardımçılarını və vəzifələri nə olursa olsun, dərəcələri və maaşları nə
qədər fərqlı olursa olsun, bütün məmurlarını da içinə alar. Əbu Humeyd əs-Sa`idi (r.a) bunu rəvayət edir: Rəsulullah
(sav), Əsd qəbiləsindən bir şəxsi vəzifəyə təyin edir. O, geri gəldikdə
belə deyir: “Bu sizin, bu isə mənə hədiyə edildi.” Rəsulullah (sav)
minbərə çıxaraq ALLAH`a həmdu-səna edir və belə deyir:
“Göndərdiyim
bir məmura nə olur ki, “Bu sizin, bu da mənə hədiyə edildi” deyir?
Atasının və ya anasının evində otursaydı görərdi ona hədiyə edilərdi
yoxsa yox? Nəfsim əlində olan (ALLAH)`a and olsun ki, sizdən biriniz
ondan bir şeyi alarsa Qiyamət günü onu boynunda daşıyaraq gələr.” (əl-Buxari, Muslim)
əl-Xattabi
belə deyir: “Bununla, məmurların aldıqları hədiyyələrin haqsız qazanc
olduğu, onların digər mübah hədiyyələr kimi olmadığı açıqlanmaqdadır.
Ona ancaq güzəşt etməsi, hədiyyə edənin üzərinə düşəni yüngülləşdirməsi
və etməli olduğu bəzi şeyləri etməməsinə göz yumması üçün hədiyə
edilmişdir.” İmam Şevkani isə belə deyir: “Hakimlərə və məmurlara
verilən hədiyyələr rüşvətin bir növüdür. Çünki hədiyyəni verən, o şəxs
hakim olmadan öncə ona hədiyə vermə vərdişi yoxdursa, bunu ona ancaq
müəyyən bir məqsəd üçün verir. Bu məqsəd, ya onunla haqsızlığını
gücləndirmək ya da hədiyyəsi ilə haqqına çatmaqdır ki, hamısı haramdır.” Elm
əhlindən başqaları da belə deyir: “Hakim və məmurlar, o vəzifəyə
gəlmədən öncə ona hədiyyə vermə vərdişi olmayan insandan hədiyyə qəbul
etməməlidir. Çünki o hədiyyə, bu halda bir rüşvətdir.” Ey
müsəlmanlar!.. Fəzilətli əməllərdən biri də yaxşılıqla vasitəçilik
etməkdir. ALLAH Q rizasını istəyərək, bir şəxsə fayda vermək və ya bir
zərəri dəf etmək kimi xeyirli işlərdə vasitəçi olmaqdır. Rəsulullah (sav) belə buyurur:
“Vasitəçilik edin ki, savab qazanasınız. ALLAH, Peyğəmbərinin dili ilə dilədiyinə hökm edər.” (əl-Buxari)
Fəqət, yaxşı bir işdə vasitəçilik edənin bunun qarşılığında hədiyyə alması haramdır. Rəsulullah (sav) belə buyurur:
“Kim
bir qardaşı üçün vasitəçilik edər və ona bunun üçün bir hədiyyə verilir
və onu qəbul edərsə, faiz qapılarından böyük bir qapıya daxil olar.” (Əbu Davud. “Həsən” hədisdir)
İbn Məsud (r.a) belə deyir: “Haqsız
qazanc; bir qardaşının ehtiyacının təmin edilməsinə yardım etməyin və
onu təmin etdikdən sonra sənə bir hədiyyə verməsi və onu qəbul
etməyindir.” Ömər ibn Abdu`l-AZİZ`in bir gün alma istədiyi, evində
alma tapmadığı və onu almaq üçün pulunun olmadığı rəvayət edilir. Ömər
ibn Abdu`l-AZİZ bayıra çıxır və əlində bir tabaq alma olan bir uşaqla
qarşılaşır. Ondan bir alma alır və iyləyir. Sonra tabağı geri verir.
Niyə belə etdiyi soruşulduqda belə deyir: “Ona ehtiyacım yoxdur!”
Deyirlər ki: “Rəsulullah (sav), Əbu Bəkr və Ömər hədiyəni qəbul
etmirdilər?” O belə deyir: “O, onlar üçün hədiyyədir, sonraki məmurlar
üçün isə rüşvətdir.” Ey müsəlmanlar!.. ALLAH`dan layiqincə qorxun və
RƏBB`inizin çağrışına qatılın! Onun əmrinə itaət edin və
yasaqladığından uzaq durun! Qəzəbinə yol açacaq şeylərdən çəkinin ki,
dünya və axirətdə xoşbəxt olun! Bu eşitdiklərinizi söyləyir;
ALLAH`dan Q özüm və sizlər üçün bağışlanma diləyirəm! Siz də Ondan
bağışlanma diləyin! Şübhəsiz O , çox Bağışlayan və Mərhəmət edəndir. Salehlərin
dostu olan ALLAH`a həmd olsun! Şəhadət edirəm ki, ALLAH`dan başqa
ibadətə və itaətə layiq haqq ilah yoxdur. O, Təkdir və şəriki yoxdur.
Şəhadət edirəm ki, Peyğəmbərimiz Muhəmməd (sav) Onun qulu və aləmlərə
rəhmət, yolunda olanlara bir nümunə və bütün insanlara bir dəlil olaraq
göndərdiyi Rəsuludur. ALLAH`ım!. Qulun və Rəsulun Muhəmmədə,
əhli-beytinə və əshabına, din gününə qədər onların yolunda gedənlərə
xeyir-dua və salam elə; onları bərəkətli et!.. Bundan sonra. Gizli
və aşkar hallarınızda, sevincli və kədərli anlarınızda ALLAH`dan
layiqincə qorxun! Kim ALLAH`dan layiqincə qorxarsa ALLAH da onu
qoruyar. Kim ALLAH`a təvəkkül edərsə ALLAH ona yetər. Kim ALLAH`a
sığınarsa ALLAH onu qoruyar və xoşbəxt edər. İman qardaşları!..
Rüşvət nəticəsində haqlar hədər olur və işlər görülməz hala gəlir. Sona
qalmalı olan əvvələ alınır və başda olmalı sona tərk edilir.
Əhəmiyyətsiz və dəyərsiz şəxs rüşvət nəticəsində önə çıxarılır.
Çalışqan və bacarıqlı şəxs arxaya atılır. Rüşvət nəticəsində nə qədər
çox haqq pozulmuşdur! Nə qədər alçaq insan yüksəldilmiş və dəyərli
insan alçaldılmışdır! ALLAH`ın qulları!.. Rüşvət əhlinə qarşı mübarizə edin və aranızda yaxşılığı yayın! Yaxşılıq, ehsan və fəzilət əhlindən olun! ALLAH`ın
qulları!.. İnsanların ən xeyirlisinə xeyir-dua və salam edin! Çünki
bunu sizə UCA ALLAH əmr etmişdir. O , belə buyurur: (“Həqiqətən,
ALLAH və Onun mələkləri Peyğəmbərə salavat göndərirlər (xeyir-dua
verirlər). Ey iman gətirənlər! Siz də ona salavat göndərib (onun üçün
salavat deyib) layiqincə salamlayın!” (əl-Əhzab surəsi, 33/56)
| Baxılıb: 1600 | Tarix: 
