Dində bu cür hallara yer vermək ədalətsizlik və ayrıseçkilik salmaqdır. Amma bununla yanaşı əgər bir insan əli bağlı namaz qılırsa və ya şalvarını qısa edirsə yenə də ona tənə etmək olmaz. Bu da yolverilməzdir. Əgər bir insan, bir müsəlman, bir mömin öz inancına dəyər verməyi bacarırsa, Quranı və dini sevirsə buna görə məscidə gələn insanın ibadətinə mane olmamalıdır. Bu cür hallar Azərbaycan xalqını bir-birinə qarşı qoya bilər. Bu cür hallara yol vermək ədalətsizlikdir. Həm dövlət, həm də hüquq mühafizə orqanları bu cür halların qarşısını almaq üçün əllərindən gələni edirlər. Amma bütün bu və ya digər hallara qarşı təkcə onlar kifayət etmir. Biz özümüz də bir-birimizə ən azı bir azərbaycanlı olduğumuz üçün hörmət etməliyik. Məsələn əgər biri hansısa bir səfərə gedibsə və rast gəldiyi bir məsciddə namaz qılırsa bu məscid Allaha aid olduğu üçün heç kimin ona mane olma haqqı yoxdur. Çünki hansısa bir namaz əhlinə mane olan bilməlidir ki, yer üzərində olan bütün məscidlər Allaha aiddir. Bu barədə yəqin ki, heç kimin şəkki yoxdur. Şübhəsi olan varsa Allah təalanın bu ayəsinə diqqət yetirmələri kifayətdir: “Şübhəsiz ki, (bütün) məscidlər Allaha məxsusdur. Allahdan başqa heç kəsə ibadət etməyin!” (əl-Cinn (Cinlər) surəsi, 18). Bunu dərk edən bütün müsəlmanlar bir anlıq düşünməlidirlər ki, ibadət edən insan məscidə zikr etməyə, namaz qılmağa gəlir. Əlbəttə əlində əsas kimi məscidin imamı və yaxud məscidin camaatı deyə bilər ki, biz axı niyə bir sünnünün bizim məsciddə namaz qılmasına icazə verək. Onlar öz məscidlərini partladan insanlardır. Bunu deyən və bu cür düşünən bir anlıq dayansın. Fikirləşməyə başlasın. Necə yəni, məscidə gəlib namaz qılmaq istəyən bir müsəlman bunu edərmi. Etməz. Bunu edən məscidə bağlı olmayan və məscidi sevməyən biri olar. Siz özünüz düşünün ki, hər gün gəlib ibadət etdiyiniz məscidə zərə verirsiniz. Axı siz bunu etməzsiniz. Yaxud belə deyək ki, siz uzaq bir səfərə çıxmısınız və rast gəldiyiniz bir məsciddə namaz qılmaq istəyirsiniz, lakin sizə mane olurlar ki, siz möhürlə namaz qılırsınz, bizim məsciddən çıxın. Bunu sizə heç kim etməz. Sizə sadəcə nəsihət edə bilərlər ki, möhürlə namaz qılmaq bəyənilmir, bu barədə tutarlı bir dəlilə söykənməmisiniz. Sizdə öz inancınız və məzhəbinizə uyğun şəkildə qarşı tərəfə iradınızı bildirirsiniz ki, mən ata-anamdan və ya yaxınlarımdan bu cür eşitmişəm, kitablardan bu cür oxumuşam və bu cür inanıram. Səhvim varsa Allah məni bağışlasın. Bu yaxınlarda bizim müsəlman qardaşlarımızdan birinin yolu Ağcəbədiyə düşüb. Həmin gün təsadüfən Cümə günü, hansısa bir namaz vaxtına düşüb və qərarlaşdırıb ki, rayonda olan məscidlərin birinə getsin. Təsadüfən də, daha doğrusu Allahın bir qədəri olaraq bu qardaşımız Ağcəbədi rayonunun mərkəzində yerləşən Cümə məscidinə rast gəlib və qardaşımız məscidə girib namaz qılsın. Məscidin həyətinə girib dəstəmaz alsın və məscidə keçib namazını qılsın. Onu qeyd edim ki, bu müsəlman qardaşımız tək olmayıb. Yanında əvvəl Cəfəri (şiyə) məzhəbinə mənsub olan, sonralar isə Əhli Sünnə və Camaat olan bir qardaşımız da olub. Hər ikisi məscidə girəndə məscidin içərisində iyirmiyə yaxın Cəfəri (şiyə) məzhəbinə mənsub olan müsəlmanlar olub. Onlar salam verib namaza başlamaq istəyəndə bir nəfər yaxınlaşıb soruşub ki, “Namaz qılmaq istəyirisniz?” Bizim qardaşlar: “Bəli” deyiblər “– Biz müsafirik, səfərdəyik, gördük burada məscid var, dedik namazımızı qılıb yenə yolumuza davam edək”. Onda həmin şəxs soruşub ki, “Möhürləmi qılacaqsınız, yoxsa möhürsüz”. Qardaşlar deyiblər ki; “Biz möhürlə qılmırıq, elə möhürsüz qılacağıq”. Bu söz bizim müsəlman qardaşımızın ağzından çıxan kimi həmin şiyə qardaşımız əsəbləşərək bunlara belə deyib: “Onda çıxın bayıra, burada yalnız möhürlə namaz qılınır”. Sonra bu Əhli Sünnə və Camaata məxsus qardaşlarımız onlara izah ediblər ki, bəs axı biz səfərdəyik və müsafir namazı qılacağıq, namazımızı qısa edib gedəcəyik yolumuza. Həmçinin müsafirə hörmət etməyin vacib olduğunu onlara bildiriblər. Qeyd ediblər ki, müsafirə əziyyət vermək düzgün deyil, axı burada nə var ki, gərək mən möhürlə namaz qılam?. Beləliklə bizim müsəlman camaatımızdan, öz vətəndaşlarımızdan, Allaha ibadətdə qul kimi durduqları üçün hörmətsizlik ediblər. Əslində bu cür hallara yol vermək özü fitnəni qalıdırmaq və bir müsəlmanı digər müsəlmana qarşı çıxarmaqdır. Əslində bu cür hallara yol vermək doğru mövqe deyil.

Mən xüsusi olaraq üzümü Qafqaz Müsəlmanları Ruahi İdarəsinə, Dini Qurumlarla iş üzrə Dövlət komitəsinə, həmçinin həmin komitənin Ağcğbğdi rayonunda olan cavabdeh şəxsinə tutub bildirirəm ki, bu cür halların qarşısı alınmalıdır. Bu cür hallara yol vermək olmaz. Hər bir kəs digər bir kəsin dini ibadət ayinlərinə hörmətlə yanaşmalıdır. Əgər hardasa səhvi varsa nəsihət edə bilərsən, düzəliş verə bilərsən, bu arzu olunandır. Ammaa möhürlə namaz qılmadaığı üçün onun namazına mane ola bilməzsən. Mən ümid edirəm ki, xalqımız, gənclərimiz bu cür hallara yol verməyəcəklər. Bu cür hallara yol verənlərə Allahdan hidayət və doğru yol istəyirəm.