Şeyx Əhməd ət-Təyyib müsəlmanları məzhəbindən asılı olmayaraq birləşməyə çağırıb.
“Selef.my1.ru” Türkiyə mətbuatına istinadən bildirir ki, Misirin nüfuzlu Əzhər universitetinin rektoru Şeyx Əhməd ət-Təyyib dünya müsəlmanlarını hansı məzhəbə mənsub olmalarından asılı olmayaraq, birləşməyə dəvət edib.
Ərəb və islam dünyasında bəzi qüvvələrin ümmət daxilində ayrılıq və düşmənliyə gətirib çıxaracaq fikirləri təşviq etdiyini, bəzi telekanalların da bu səpkidə fəaliyyət göstərdiyini bildirib. Avropa Birliyi kimi dil, millət və inanc müxtəlifliyinə rəğmən güclü təşkilatların qurula biləcəyini qeyd edən Əzhər şeyxi buna nail olmaq üçün rəhbəri olduğu qurumun səyini əsirgəməyəcəyini deyib.
İran prezidentinin köməkçisi Həmid Bəqai ilə görüşünə dair mətbuata açıqlama verən Şeyx ət-Təyyib Misir və İran arasında siyasi ixtilafların ola biləcəyini, lakin bunun müsəlmanların birliyinə zərər verməməli olduğunu vurğulayıb.
Siyasətlə siyasətçilərin məşğul olmasının vacibliyini bildirən Əzhər şeyxi alimlərin, mütəfəkkir və ziyalıların hədəfinin islam ümmətinin birliyini təmin etmək olduğunu deyib. Müsəlman xalqlar arasında birləşdirici amillərin çoxluğuna rəğmən islam dini mənsublarının hələ də arzu edilən səviyyədə birləşə bilmədiklərini qeyd edən rektor Əzhər universitetinin bu çərçivədə sünniliyin və şiəliyin mövqeləri arasında yaxınlaşma əldə olunması üçün səy göstərəcəyini ifadə edib.
İran prezidentinin köməkçisi isə açıqlamasında islam dünyasının birliyi və mövcud ixtilafların aradan qaldırılması xüsusunda Misirin və Əzhər universitetinin böyük rol oynaya biləcəyini deyib.