“...Özünüz üçün dünyada nə yaxşı iş görsəniz, Allah dərgahında onun daha xeyirli və daha böyük mükafatının olduğunu görəcəksiniz...” (əl-Müzzəmmil, 20).
Ramazan insanpərvərlik və sosial həmrəylik ayıdır. Allah Təala istəyir ki, bu mübarək ayda cəmiyyətin müxtəlif təbəqələri, xüsusən də varlılar və kasıblar arasında mənəvi bağlılıq və xeyirxahlıq münasibətləri güclənsin.
Mənəvi bağlılıq. İnsan bir müddət yemək və içməkdən imtina etdikdə ətrafındakı yoxsulların, imkansızların halını başa düşür, həqiqi aclığın nə olduğunu öyrənir. Nəticədə, kasıbların halına acıyır və onlara müxtəlif yollarla kömək etməyə başlayır. Bu cür ülvi hissləri yaşayan şəxs özünəvurğunluq və sinfi bərabərsizliyə “yox” deyir.
Xeyirxahlıq münasibətləri. Allah bu ayda oruc tutanları imkanları daxilində kasıb və imkansızlara yaxşılıq edib, kömək göstərməyə ruhlandırır. Kasıblara ediləcək kömək aşağıdakılardan ibarətdir:
Zəkat. Birillik qazancımızın 2.5%-ni Ramazanda kasıblara və imkansızlara zəkat verə bilərik.
Sədəqə. Kasıb və imkansızlara pulla, ərzaqla, geyimlə, dərmanla – bir sözlə, onların möhtac olduqları hər bir şeylə kömək əlimizi uzada bilərik.
Fitrə. Ramazan ayında fitrə verməklə kasıbları sevindiririk. Fitrə – bir insanın gündəlik yemək-içməyini təmin edəcək miqdarda olmalıdır. Bu, pul və ya ərzaq ola bilər.
İftar süfrələri. Ramazanda maddi imkanımıza uyğun olaraq oruc tutanlara iftar süfrəsi aça bilərik.
Fidyə. Oruc tuta bilməyənlər tutmadıqları hər bir gün üçün kasıblara fidyə verirlər. Fidyə bir nəfərin gündəlik qidalanmasını təmin edəcək miqdarda olmalıdır.
| Baxılıb: 347 | Tarix: 
