Başda İsrail, ABŞ və Qərb dünyası olmaqla bir sıra ərəb ölkələrinin Misirdə keçirilən prezident seçkilərində “Müsəlman Qardaşlar” (MQ) hərəkatının namizədinə qarşı açıq şəkildə ordunun və Hüsni Mübarəkin namizədi Əhməd Şəfiqi dəstəkləməsi ölkədə mübarizənin hələ uzun müddət davam edəcəyini deməyə əsas verir.
Altmış ildir ki, ölkədə hakimiyyəti əlində saxlayan hərbi bürokratiyanın, Ali Hərbi Şuranın, polisin, qibtilərin, Mübarək tərəfdarı olan iş adamları və laiq təbəqənin MQ-a qarşı apardıqları mübarizəyə rəğmən seçki Məhəmməd Mürisinin qələbəsi ilə başa çatdı.
Seçkilərin ikinci turunun baş tutmasından iki gün qabaq Misir Konstitusiya Məhkəməsinin parlamentin legitimliyini ləğv etməsi və Mübarəkin “övladım” - deyə çağırdığı Əhməd Şəfiqin qarşısındakı bütün maneələri qaldırması köhnə rejim tərəfdarlarının əhval-ruhiyyəsinə müsbət təsir göstərdi. Ancaq səslərin 52,3%-ni toplayaraq, qələbəsini elan edən MQ-nin prezidentliyə namizədi Mürsi Misirdə tarixi uğur qazandı. O, seçkidən sonrakı ilk çıxışında ölkəyə demokratiya və azadlıq bəxş edən Allaha həmd etdi.
Mürsi Misir xalqına “qardaşlarım”, - deyə müraciət edərək, birlikdə müstəqillik, inkişaf, sülh və demokratiya yolu ilə irəliləyəcəklərini, səylərini birləşdirərək yeni Misiri inşa edəcəklərini ifadə etməklə yanaşı, inqilab zamanı həyatını itirən və yaralanan misirlilərin haqlarının hüquqi kanallarla alacağını ifadə etdi. Bir ildir ki, beynəlxalq ictimaiyyətin nəzərlərinin yönəldiyi Təhrir meydanında bir çox mühüm mesaj verdi.
Ərəblər arasında belə bir məsəl var: “Misir ərəb dünyasının anasıdır”. Ərəb xalqları düşünməzdən, oturub durmazdan qabaq əvvəlcə Misirə baxarlar. Misir ərəb xalqları üçün həmişə nümunə təşkil etmişdir.
Altmış illik hərbi diktatura altında təzyiq altında saxlanılan Misir xalqı yeni prosesin başlanğıcında uzun illər boyu ödədiyi bədəllərin müqabilində xalqın istəyi ilə yeni üfüqlərə yelkən açacaq. Səksən illik mübarizə təcrübəsi ilə dövrümüzə gəlib çıxan MQ hərəkatı çox böyük imtahandan keçməlidir.
Başda İsrail, ABŞ və Qərb dünyası olmaqla bir sıra ərəb ölkələrinin Misirdə keçirilən prezident seçkilərində “Müsəlman Qardaşlar” (MQ) hərəkatının namizədinə qarşı açıq şəkildə ordunun və Hüsni Mübarəkin namizədi Əhməd Şəfiqi dəstəkləməsi ölkədə mübarizənin hələ uzun müddət davam edəcəyini deməyə əsas verir.
Ərəb inqilabları Qərb dünyasını iki məsələdə bərk qorxuya salmışdı. Bunlardan biri neft amili, digəri isə İsrailin təhlükəsizliyi məsələsidir. ABŞ və İngiltərənin 60 ildir ki, təhlükəsizlik məsələləri xüsusunda fikirlərinə müraciət etdikləri Brzejinski və Birləşmiş Ştatların sabiq Dövlət katibi Henri Kissincer əbəs yerə Yaxın Şərqdə meydana gələrək islam dünyasını bir dam altında birləşdirəcək islami siyasi düşüncə təcrübəsinin Amerikanın XXI əsrdə dünyaya ağalıq planlarını alt-üst edəcəyini bildirməmişdilər.
Tunis, Yəmən, Liviya və Misir inqilabları, eləcə də Suriyadakı müqavimət hərəkatına baxdığımız zaman hadisələrin inkişafını doğru təhlil etmədiyimizə təəssüflə şahid oluruq. Hüsni Mübarəkin devrilməsinə rəğmən Misirdə mübarizə bu gün də davam edir. Qərb ilə Mübarək qüvvələrinin olduqca sıx əməkdaşlığının mübarizənin hər cəbhəsində böyüyərək, davam edəcəyinin işarələri aydın şəkildə görünür.
Misir xalqı prezident seçkilərində qələbə qazanan MQ namizədinə sahib çıxacaqdır. MQ-nin 80 illik islami əxlaqi, siyasi və sosial təcrübəsi həm Misir, həm də ərəb və islam dünyası üçün çox böyük fürsətdir.
Misirin islam dünyasına söyləyəcəyi çox sözü var. Azad misirlilər ərəb və islam dünyası ilə güclərini birləşdirmək surətilə əsrlər boyu həsrətində olduğumuz mədəniyyət irmağına yeni çalar və kolorit qataraq, arzularımızın və inancımızın sancılarına məlhəm olacaqdır.
| Baxılıb: 562 | Tarix: 
