"Türkiyə Deyanet İşləri Vaqfi” tərəfindən 1993-cü ildən tikilən "Şəhidlər məscidi” yaxın günlərdə açılacaq. Bu barədə şad xəbər bu gün redaksiyamıza etibarlı mənbədən daxil olub. Beləcə, bir müddət öncə Bakıda ibadət evlərinin üzərində dolaşan "qara buludlar” deyəsən tədricən çəkilməyə başlayıb.

Lakin mənbə məscidin müəyyən məhdudiyyətlər çərçivəsində fəaliyyət göstərəcəyini deyib. Qaynağın dediyinə görə, bundan sonra məscidə cümə namazları izdihamı şəkildə qılınmayacaq. Bu da o deməkdir ki, cümə namazlarına daha az dindar iştirak edəcək.

Bu gün, məlumat dəqiqləşdirmək üçün "Şəhidlər məscidi”nə üz tutduq. Əfsus ki, Türkiyənin Azərbaycandakı səfirliyinin dini işlər üzrə müşaviri Müzəffər Şahini tapa bilmədik. İdarədə köməkçi vəzifəsində çalışan xanım M.Şahinin Türkiyədə olduğunu söylədi: "Onun konkret nə vaxta gələcəyi də məlum deyil”. M.Şahinin müavini Bayram Altıntaşla əlaqə saxlamaq isə mümkün olmadı.

Köməkçi məscidin fəaliyyətə başlayacağı ilə bağlı xəbərdən məlumatsız olduğunu söylədi: "Bizə bu barədə heç bir söz deməyiblər. Ümid edirəm ki, xəbəriniz doğru olacaq. Ancaq gördüyünüz kimi məscid işləmir”.

Həqiqətən də, "Şəhidlər məscidi”nin qapısı bağlı idi. Ərazidə təmir-tikinti işlərinin görülməsinin də şahidi olmadıq.

Xatırladaq ki, ötən ilin aprelindən məscid günorta namazından sonra təmir adı ilə bağlanıb. Ümumiyyətlə, ötən ildən qapadılan məscidlər hələ də fəaliyyətsizdir. Onların bir neçəsi təmir-tikinti, bəziləri isə qanunsuz tikili adı altında kilidlənib. Analoji proses bölgələrdə həyata keçirilib. Hazırda "Şəhidlər camesi”, "Peyğəmbər” (s), "Əbu-Bəkr”, Yeni Günəşlidəki "Fatimeyi-Zəhra” (s.ə.) məscidlərinin qapıları bağlıdır.

Əlavə edək ki, məsələyə Qafqaz Müsəlmanları İdarəsinin rəisi Şeyxülislam Hacı Allahşükür Paşazadənin müdaxiləsi də fayda verməyib. Hazırda Azərbaycanda 1750 məscid var ki, onun 100-ə yaxını fəaliyyət göstərir.

Emil SALAMOĞLU