Həzrəti Məhəmməd və İslam dinini təhqir xarakterli filmin istehsalının təfsilatına dair yeni detallar gün üzünə çıxır. Artıq filmin aktyor heyəti “aldadıldıqlarını” bildiriblər.
Misir, Liviya və Yəməndə geniş xalq kütlələrinin etirazına səbəb olan “Müsəlmanların məsumiyyəti” filminin rejissoru Sem Besil adlı şəxsin həqiqətən mövcudluğu belə mübahisə mövzusu olduğu bir vaxtda aktyor heyəti mətbuata açıqlamalarında aldadıldıqlarını bəyan etdilər.
Amerika yəhudisi olduğu və sərvətini əmlak bazarındakı əməliyyatlardan qazandığı bildirilən filmin rejissoru “Müsəlmanların məsumluğu” adlı filmə beş milyon ABŞ dolları məbləğində vəsait sərf edib. Besil sözügedən məbləği yəhudi iş adamlarından aldığını artıq etiraf edib.
“Youtube.com” videoportalında yerləşdirdiyi mesajlar istisna olmaqla Besil barəsində internet saytlarında doğru-dürüst məlumata rast gəlinmir. Maraqlıdır ki, xarici mətbuat bir qədər əvvəl Birləşmiş Ştatlarda Sem Besil adlı əmlakçının qeydiyyatda olmadığını yazıb.
Filmin bazara çıxarılma tarixi
ABŞ-da istehsal olunan və iyun ayının sonunda Hollivud bulvarındakı kiçik özəl “Vine” kinoteatrında nümayiş etdirilən filmin bəzi hissələrinin ərəb dilinə çevrilərək, “Youtube.com” videoportalında yerləşdirilməsi ilə islam dünyasında etiraz dalğasının başlanmasına start verildi. Filmdən kadrlar məlum sayta hələ iyul ayının 1-də Sem Besil ləqəbli şəxs tərəfindən ingilis dilinə tərcümə edilərək, yüklənildiyi də öyrənilib.
Aktyorlar filmin ssenarisindən və məzmunundan doğrudanmı bixəbərdirlər?
Aldadıldıqlarını iddia edən film truppası İslam dini və Həzrəti Məhəmməd haqda nalayiq ifadələrin filmə sonradan edilən dublyaj əsnasında əlavə olunduğunu və qeyd edilən ifadələrin aktyorlara təqdim edilən çıxış vərəqələrində yer almadığını vurğulayıb.
Kaliforniyanın Beykrsfild regionunda yaşayan aktyor Sindi Li Qarsiya yerli mətbuata açıqlamasında 2 min il əvvəl Misirdəki həyatdan bəhs edən “Çöl döyüşçüləri” adlı filmə çəkildiyini güman etdiyini deyib. Qarsiya filmin rejissorunu məhkəməyə vermək niyyətində olduğunu da qeyd edib.
Filmin rejissoru olduğu bildirilən yəhudi Sem Besil “Müsəlmanların məsumluğu” ekran “əsər”ini təhrikedici məqsədlə istehsal etdiyini etiraf edib. Filmin hazırlanmasına təşviq edən şəxslərdən biri isə ABŞ-ın Florida ştatında bir neçə il əvvəl Qurani-Kərimi yandırmaq aksiyası keçirən rahib Terri Consdur. Ərəb dünyasında filmə dəstək kampaniyası isə Kaliforniya ştatının sakini, islam əleyhdarlığı ilə tanınan misir əsilli xristian qibti Morris Sadekdir.
Filmin çəkilişinə tərəf çıxanlar arasında əvvəllər məhkum həyatı yaşamış Nakoula Basselinin də adı çəklir. Nakoulanın saxta sənədlərlə dələduzluq ittihamı ilə 21 ay azadlıqdan məhrum və yüzminlərlə dollar məbləğində təzminat ödəməyə məhkum edildiyi məlumdur.
Liviya və Misirdəki hücumlar aylar əvvəl planlaşdırılıb
Filmlə bağlı toplanılan bütün informasiya Liviya, Misir və Yəməndəki ABŞ səfirliklərinə hücumların uzun müddət qabaqcadan planlaşdırıldığını deməyə əsas verir.
Liviyanın Benqazi şəhərində Amerika konsulluğuna təşkil edilən hücumun peşəkar təlim keçmiş qrup tərəfindən həyata keçirildiyi, sözügedən qrupun akt əsnasında raketlərdən istifadə etdiyi istintaqa məlumdur.
Liviyalı nümayişçilər etiraz aksiyaları zamanı bir qrupun hadisəni təxribata sürükləyərək, aradan çıxdığını deyiblər. Benqazidəki hücum vaxtı 4 Amerika vətəndaşı ilə yanaşı, 10 liviyalının da həyatını itirdiyi qeyd edilir.
Liviyadakı hücum aktına görə məsuliyyəti öz üzərinə götürdüyü iddia edilən “Ənsar əş-Şəriə” təşkilatı sonradan yazılı açıqlamasında səfirliyə hücumla bağlı heç bir əlaqəsinin olmadığını bəyan etdi.
“Hadisələrin arxasında hansı qüvvələrin olduğu…”
Filmin istehsalının və səfirliklərə hücumun eyni mərkəzdən idarə olunduğu gün keçdikcə daha da aydın olur. Siyasi müşahidəçilər islam dünyasının həssas balansını bilən siyasətçilərin məlum filmlə bir neçə “quş”u birlikdə vurmağa çalışdığını qeyd edirlər.
Bunlardan biri Suriyadakı qətliamı ört-basdır etməkdir. Buna “Ərəb baharı”ndan sonra özünə gəlməyə çalışan ölkələrdə “əl-Qaidə” təşkilatının nüfuzunu hələ də qoruyub-saxladığını göstərmək və noyabr ayında Birləşmiş Ştatlarda keçiriləcək seçkilərdə islamçıların qarşısındakı maneələri aradan qaldırdığı iddia edilən prezident Barak Obamanı çətin vəziyyətdə qoymaqdır.
Liviya hökuməti və Ümumliviya Milli Konqresi hadisəni araşdırmaq üçün müştərək qurum formalaşdırıldığını elan edib. Qurum istintaqın davam etdiyini və hazırda “hadisənin arxasında hansı qüvvələrin dayandığını açıqlaya bilməyəcəklərini” bəyan edib.
Hücumun hansı formada həyata keçirilməsi ilə bağlı Liviya rəsmiləri tərəfindən heç bir açıqlama verilməzkən qeyri-rəsmi mənbələr tərəfindən Benqazidəki ABŞ səfiri və diplomatik korpusun digər nümayəndələrinə edilən hücum zamanı raketlərdən və Kalaşnikov markalı avtomatlardan istifadə edildiyi bildirilib.
| Baxılıb: 512 | Tarix: 
