Prezident Administrasiyası ictimai-siyasi şöbəsinin müdiri Əli Həsənov "Şəhidlər məscidi”nin gələcək taleyilə bağlı bu günlərdə "Nedelya” qəzetinə açıqlama verib. Ə.Həsənov "Şəhidlər məscidi”ndə təmirin nə zaman bitəcəyilə bağlı sualı cavablandırarkən oranın yalnız təmir səbəbilə bağlandığını düşünmədiyini deyib. Onun sözlərinə görə, məscidin sürüşmə zonasında yerləşməsi də bağlanmasında mühüm amil olub. "Ümumilikdə isə Şəhidlər Xiyabanı Allaha ibadət yeri ola bilməz”, - deyə Ə.Həsənov mövqeyini bildirib.

Ə.Həsənov protokol tədbirlərinin keçirildiyi Şəhidlər Xiyabanında yüzlərlə maşının saxlanılmasını, tıxacların yaranmasını, hamının gözü qarşısında dəstəmaz alınmasını, namaz qılınmasını yolverilməz adlandırıb. Bütün bunların nəzərə alınaraq, məscidin fəaliyyətinin müvəqqəti dayandırıldığını deyən Ə.Həsənov gələcəkdə, bu Allah evinə gələnlər üçün uyğun şərait yaradıldıqdan sonra, onun fəaliyyətinin tam dayandırılmalı oduğunu vurğulayıb.
 "Əlbəttə, mən bunu dövlət adından demirəm, bu, mənim şəxsi fikrimdir. Bu məscidin yerləşdiyi yer münasib deyil, əgər o başqa, daha uyğun yerdə inşa edilsəydi, heç bir problem olmazdı”, - deyə Ə.Həsənov məscidin gələcək taleyinə qismən aydınlıq gətirib.
Türkiyənin Azərbaycan səfirliyinin dini attaşesi Müzəffər Şahin "Turan”ın müxbirilə söhbətində "Şəhidlər məscidi”nin taleyilə bağlı rəsmi şəxslərin açıqlamalarını eşitdiklərini, amma bununla bağlı hər-hansı bir şərh və ya məsləhət vermək fikrində olmadıqlarını vurğulayıb. "Amma bunu nəzərə çatdırıram ki, bu məscid 1996-cı ildən fəaliyyətə başlayıb, Azərbaycanın mərhum dövlət başçısı Heydər Əliyev və Türkiyə cümhur başqanı Süleyman Dəmirəlin xeyir-duası ilə tikilib”, - deyə M.Şahin xatırladıb.
Ə.Həsənovun məscidin bağlanmasına sürüşmə zonasında yerləşməsinin də təsir etməsi fikrinə münasibət ifadə edən M.Şahin məscidin təmir adı ilə bağlanmasını yada salıb. "Bəlkə sonradan geoloqlar burada ölçmə işləri apararaq, sürüşmə aşkar ediblər, bilmirəm. Amma gözlə baxanda belə bir sürüşmənin olduğu görünmür”, deyə M.Şahin qeyd edib.
Məscidin gələcək taleyi barədə danışan dini attaşe Azərbaycanın müstəqil dövlət olduğunu, rəsmi mövqeyinə uyğun hərəkət edəcəklərini söyləyib.
Bir neçə il əvvəl hakimiyyət "Şəhidlər məscidi” yanındakı bulağı sökmüşdü. Bu, Bakı və Ankara arasında qalmaqala səbəb olmuşdu. Ötən il məscidin yaxınlığında Türkiyə əsgərlərinin xatirəsinə ucaldılmış abidədən türk bayraqları yığışdırılıb ki, bu da qalmaqala səbəb olub.
2009-ci ilin yanvarında Bakı islam mədəniyyəti paytaxtı elan edilmişdi. Elə həmin ilin aprelində "Şəhidlər məscidi” təmir adı ilə bağlanıb, "Muhəmməd peyğəmbər məscidi”, Neft Daşlarında bir məscid sökülüb, "İlahiyyat məscidi”nin fəaliyyətinə problem yaradılıb, "Fatimeyi-Zəhra məscidi”nin sökülməsi haqda məhkəmə qərarı verilib, azana qadağa qoyulub.

Xəbər xidməti