Axirətə iman hər şeydən əvvəl insanın hədəf və istiqamətini müəyyən etməsinə imkan verir, yaradılmasındakı məqsədi, hikmət və qayəni öyrədir. Belə inanc sahibi insanlardan ibarət cəmiyyət doğru yoldan ayrılmaz, qazancını halal yollarla əldə etməyə çalışar, hiyləyə, yalana və rüşvətə yaxın durmaz. Öz haqqını bildiyi kimi başqalarının haqqını qəsb etməz, heç kimə haqsızlıq etməz.
Həmçinin, axirətə inanan kəs həm dininin buyruqlarını, həm də məsul olduğu dünyəvi işləri qüsursuz şəkildə yerinə yetirir. Çünki o, mükafat və cəza gününün mövcudluğuna inanmaqla hər bir insanın bu dünyada etdiyi əməllərin hesabını Allahın hüzurunda verəcəyinin fərqinə varır. Bu inanc insanların qəlbində sülh hissinin yaranmasına və təkmilləşməsinə gətirib çıxarar. İnsan sülh hissi ilə ədaləti bərqərar edir. Ədalət hissinə sahib insan isə özünü mütləq ədalətin tam bərqərar olacağı qiyamət gününə hazır vəziyyətə gətirir.
Axirətə, qiyamət gününə iman insanların ümidlərini təzələyir, ağrılarını azaldır və yüngülləşdirir, habelə həyatı boyu üzləşdiyi çətinliklərə dözüb tab gətirməsinə imkan verir. Axirətə iman, insanı yalnız xeyirli əməlləri işləməyə, pisliklərdən çəkinməyə və məziyyəti mənimsəməyə yönəldir. Qiyamət gününə inanan insan son nəfəsini verdiyi an keçmişini xatırlayaraq, gördüyü xeyirli əməllərdən dolayı rahatlıq tapır. Çünki ölüm onun üçün bir yox olub getmək deyil, sonsuz bir həyatın başlanğıcı, bu aləmin qapısını açmaqdır. Axirət inancı dünya həyatına həddən artıq bağlanmanın qarşısını alır, eləəc də başqalarına yaxşılıq etmə düşüncəsini formalaşdırır.
Axirətə iman insanda məsuliyyət hissi yaradır. Bu, hüquqi və əxlaqi baxımdan mühüm sərmayədir. Davranış və hərəkətlərini izləmək üçün hər insan üçün nəzarətçi ayrılması qeyri-mümkün olduğuna görə axirətdə hesab vermə duyğusu insanların əməllərində diqqətli davranmalarını təmin edər, cəmiyyətdə zorakılıq və terror hadisələri azalar. Etdiyi hər əməlin, söylədiyi hər bir sözün qeydə alındığına və axirətdə hesab verəcəyinə inanan kəs daha diqqətli davranar, sözlərinin naxoş və ürəksındırıcı olmamasına səy göstərər.
Unutmamalıyıq ki, insan cənnəti və ya cəhənnəmi bu dünya ikən qazanır. Bu səbəbdən dünya axirət yurdunun tarlasıdır. Dünya tarlasına nə əkilərsə, axirətdə o biçiləcəkdir. Ona görə də insan ölüm gəlməzdən qabaq düşünərək, dünyanın dəyərini doğru bilməlidir. Axı insan dünyaya bir dəfə gəlir və ölənədək etdiyi əməlləri azuqə kimi axirətə aparır. Bu dünyada yaxşı əməl sahibi olan kəs axirətdə xeyirli əməllərinin savab və mükafatını tapacaqdır. Dünya həyatında pis əməllə yadda qalanlar isə axirətdə etdiklərinin cəzasını çəkəcəklər. Bu səbəbdən axirət azuqəmizi indidən yaxşı hazırlamağa çalışmalı və orada dadımıza çatacaq xeyirli əməllər görməliyik.
Axirəti qazanmaq üçün dünyanı xor görməyə və həqir hesab etməyə lüzum yoxdur. Şübhəsiz ki, dünya həyatı axirətlə müqayisədə daha qısadır. O, bir göz qırpımında ötüb keçir. Dünya həyatının insanlara verdiyi xoşbəxtlik məhduddur, amma qazanmaq istədiyimiz axirətin yolu da elə bu dünyadan keçir. İnsan məhz bu səbəbdən bu dünyanı əldə etmək üçün çalışmalıdır. Həqiqi müsəlman heç ölməyəcəkmişcəsinə bu dünya üçün, sabah öləcəkmişcəsinə axirət üçün çalışandır. İnsan axirəti qazanmaq üçün dünya nemətlərindən uzaqlaşmamalı, dünyalığı əldə etmək üçün isə axirət səfərinə hazırlıqda laqeyd davranmamalıdır. O, nə bu dünya üçün axirəti, nə də axirət üçün dünya həyatını tərk etməli, hər ikisinə bərabər səviyyədə yanaşmalı, tarazlığı qoruyub saxlamalıdır.
Axirətə inanan insanlar rahatlıq tapan və xoşbəxt kəslərdir. Belələri qiyaətdə verəcəyi hesabdan çəkinərək, heç kimə zülm və pislik etməz, insanları sevər və kömək edərlər. Həmçinin, belələri acgözlü olmaz, pis niyyətləri reallaşdırmaq arxasınca qaçmazlar. Allahın razılığını qazanmaq və cənnətlə mükafatlandırılmaq üçün davamlı surətdə yaxşı əməllər görərlər. Axirətə iman gətirən ona verilən vəzifəni əksiksiz və vaxtında yerinə yetirməyə çalışır, əks təqdirdə hesabını axirətdə verəcəyini dərk edir.
Ona bir şey əmanət edildikdə xəyanət etməz, etibarlı insan olar. Başqalarının malına, canına, namusuna, hüquq və azadlığına zərər toxundurmaz. Belə insanlardan ibarət cəmiyyətdə qarşılıqlı sevgi, hörmət və etimad olmaqla yanaşı, rahatlıq, hüzur və xoşbəxtlik də vardır. Axirət inancı insanlar arasında yardımlaşmaya, birlik və həmrəyliyə töhfə verir. İnsan daim yaxşı və doğru olanın axtarışındadır. Hazırı, kəsə yoldan haqsız qazanc əldə etməyi düşünməz, dinin əmr və qadağanlarına riayət edər, gözəl əxlaqı tərk etməz, heç kimə zərər verməz, vaxtını və ona verilən nemətləri əbəs yerə sərf etməz. Habelə axirətə iman gətirən kəs ağlını, biliyini və gücünü israf edərək pis işlər görməz, insanlara hörmət və mərhəmətlə yanaşar.
| Baxılıb: 809 | Tarix: 
