Terror təhlükəsi hardadır?

Təxminən, 12:35-də məsciddən dindarlar çıxmağa başladı. Onların sözlərinə görə polis saat 11-dən məscidin qabağına post qoyub; məscidin içində kifayət qədər yer qalsa da insanları cümə namazına buraxmayıb.
Ən maraqlı məqam odur ki, cümə namazı bitdikdən sonra polislər heç nə olmayıbmış kimi bir nəfərədək ərazini tərk etdilər. Onlar gedəndən sonra çöldə dayanan insanlar məscidə daxil olub zöhr namazlarını qılmağa başladılar. Məntiqi olaraq, anormallıq yaranır; bəyəm terror təhlükəsi təkcə cümə namazı ilə bağlıdırmı? Tutaq ki, kimsə həqiqətən “Əbu Bəkr” dini icmasına qarşı terror həyata keçirməkdə maraqlıdır; belə çıxır ki, bu terror ancaq cümə namazı vaxtı törədilməlidir? Yeri gəlmişkən, xatırladaq ki, 17 avqustda məscidə bomba atılan gün də cümə namazı qılınan gün yox,  bazar günü idi.

Məscidin imamı çaşqınlıq içindədir

Yaranan vəziyyətlə bağlı biz məscidin imamı Rauf Abbasquliyevlə söhbətləşdik. Onun sözlərinə görə axırıncı dəfə polisin məscid qarşısında post qurması sentyabrın 15-də olub; o vaxt da məscidə dindarları məhdud sayda buraxmışdılar. Məscidin imamı deyir ki, sonradan problem qismən də olsa yoluna qoyulub, məscidin içərisi tutan qədər insanın ibadət etməsinə heç bir müdaxilə olunmayıb. Bu gün (dünən ) isə polisin səyi nəticəsində məscidin üçdə ikisi boş qalıb:
- Ola bilərmi polis sizin xütbənizi daha az adam dinləsin deyə özəlliklə cümə namazına belə müdaxilə edir?
- Xeyr, düşünmürəm ki, belə olsun. Axı xütbə onsuz da məscidin içində səslənir.
- Bəlkə xütbə üçün seçdiyiniz mövzular arzu edilən deyil. Məsələn bu gün nə haqda xütbə etməyi planlaşdırmışdınız?
- İslam qardaşlığı haqqında”.
 Cənab Abbasquliyev gücləndirilmiş polis rejiminin səbəbləri haqqında heç nə bilmədiklərini də dedi: “Hər halda bizə bu haqda heç bir xəbərdarlıq filan edilməyib. Qabaqkı həftələrdə burda bir nəfər  mülk mühafizə olardı. Daha bu qədər polisə nə ehtiyac var biz anlamırıq”.

Qiyaməti gözləyənlər
Söhbət etdiyimiz sıravı dindarlar son aylarda onlara yaradılmış maneələri əsl səbəbini tapmaqda çətinlik çəkdiklərini bildirirlər. Onlardan biri şikayətlənir ki, ölkədə hətta satanistlərin öz inanclarını rahat həyata keçirməyə şərait olduğu halda sələfilərə qarşı ayrı-seçkilik aparılır: “Cümə namazını Allah (s.T) Quranda bizim üçün əmr edib. Əlhəmdulillah rəhbərlərimiz də müsəlmandır, bəs niyə bizə cümə namazlarımızı qılmağa imkan vermirlər. Bu ölkədə sinaqoqa, kilsəyə sərbəst girib çıxıb ibadət edirlər, məscidin qabağına isə polis qoyurlar. Qiyamət günü bunun sorğu sualı çox ağır olacaq”.

Natiq