Tehran hakimiyyətinin ciddi çətinliklərindən biri də gənclərin sosial problemlərinin həllidir.
Başqa sözlə, iş tapa bilməyən, ailə qurmağa pul
olmayan və s. sosial problemlərin məngənəsində ilişib qalan gəncliyin
bir hissəsi narkotik maddələrin aludəsinə çevrilir.
Bu azmış kimi, ölkədə 30 ildir başqa bir sosial problem də yaşanır –
seksual tələbatın ödənilməsi. Hələ bir neçə il öncə, Rəfsəncaninin
prezidentliyi dönəmində «Məhəbbət evləri»nin yaranması ilə bağlı məsələ
gündəliyə çıxarılmışdı. Amma bir çoxları bunun «islam cəmiyyətinə
yaraşmadığını» əsas gətirib, problemin həllindən vaz keçməyə, yaxud onu
müvəqqəti dondurmağa üstünlük verdi.
Son günlər İranda siğə məsələsi yenidən gündəliyə çıxarılıb.
Lent.az-ın «azadtribun»a istinadən məlumatına əsasən, İran
hakimiyyətinin islahatçı qanadına bağlı «çeres» saytı bildirib ki,
İranın alış-veriş bazarında siğə olunan qadınlarla bağlı yeni üsullar
meydan çıxıb. Tehranın Punək, Vənək, Səadətabad, eləcə də qərb
hissəsindəki yaşayış məntəqələrində pizza qutularının üstünə siğə
mərkəzləri, hətta siğə olunmaq istəyən qadınların telefon nömrələri
yazılıb.
İran İslam Respublikasındakı siğə «mütəxəssislərinin» qənaətincə, belə
təbliğat üsulunun çox yaxşı nəticəsi ola bilər. «Mütəxəssislər» bu
təbliğatı belə izah ediblər: «Pizzaya tünd ədviyyatlar qatılır, bu isə
onu yeyib doyan kişilərin könlünə qadınları salır».
Xatırladaq ki, bu il avqustun sonunda İran parlamentində müvəqqəti
evliliyin (siğə) rəsmən sənədləşdirilməsi, yəni siğənin daimi nikah kimi
dövlət qeydiyyatına alınması haqda təklif səsə qoyulub. Bu məsələ
parlamentə deputat Seyid Məhəmmədcavad Əbthinin təşəbbüsü ilə çıxarılıb.
Təklifdə daimi evlilik barədə nikah sənədlərindən «daimi» sözünün
çıxarılması da irəli sürülüb. Səsvermədə iştirak edən 206 deputatdan
45-i lehinə, 122-si əleyhinə səs verib. 24 deputat tərəfsiz olub.
Bununla da təklif qəbul edilməyib.
Təklifə qarşı çıxanların əsas arqumenti bu olub ki, siğənin dövlət
qeydiyyatına alınması ailəlilər üçün sərfəli deyil, bunun xoşagəlməz
nəticələri ola bilər.
Müvəqqəti evliliyin dövlət qeydiyyatına alınmasının əleyhinə çıxış edən
deputat Mustafa Kəvakibian siğənin zinadan yaxşı olduğunu deyib:
«Qurani-Kərimdə müvəqqəti evlilik təkid edilib. Biz siğəni düzgün həyata
keçirə bilsək, bu, zinadan yaxşı olar. Lakin bunun sənədləşdirilməsi
məsələsinə gəlincə, deməliyəm ki, ağrımayan başa dəsmal bağlamazlar. Biz
siğəni sənədləşdirməklə öz əlimizlə şəhvətpərəst, ehtiraslı və imkanlı
kişiləri müvəqqəti evliliyə getməyə təşviq etmiş oluruq”.
Siğənin cəmiyyətdə yaxşı qarşılanmayacağından ehtiyatlandığını deyən
İran parlamentinin başqa bir üzvü Mehdi Kiçikzadə bir sıra din
xadimlərinin siğə ilə bağlı risalələrindən örnəklər göstərərək, məsələni
çox mürəkkəbləşdirməyə ehtiyac olmadığını vurğulayıb: «Siğədə məqsəd
çox sadədir. Bəzi cənablar utanıb deməsələr də, bildirməliyəm ki, siğə -
tərəf müqabildən ləzzət və həzz almaq üçündür. Bunu deməkdən də
utanmıram”.
Təklifi dəstəkləyən Zöhrə İlahian isə deyib ki, müvəqqəti evliliyin
dövlət qeydiyyatına alınması kişilərin qadınlardan sui-istifadə
etməsinin qarşısını ala bilər: «Belə evliliyin qeydiyyata alınmaması
kişilərə məsuliyyətdən boyun qaçırmaq və hər şeyi inkar etmək imkanı
yaradır. Bu isə siğə nəticəsində doğulan uşağın atasının kimliyini
müəyyənləşdirməyi problemə çevirir».
| Baxılıb: 874 | Tarix: 
