Qurani-Kərimdə adları çəkilən peyğəmbərlərin hər biri müxtəlif peşə sahibi olmuş, dolanışıqlarını bu yolla təmin etmişlər. Beləliklə onlar insanlara həm gözəl və faydalı peşələri öyrətmiş, həm də digərlərinə möhtac olmadan yaşamanın qaydasını əyani nümayiş etdirmişlər.
Onlar öz çörəklərini özləri qazanıb heç kimə möhtac olmadıqlarına görə, tövhid əqidəsini heç kimdən qorxmadan yaya və müdafiə edə bilmişlər.
Görəsən, müqəddəs kitabda adları zikr edilən peyğəmbərlər hansı peşənin sahibi olublar? Aşağıda bu suala cavab axtarılıb:
Həzrəti Adəm ilk əkinçi və cütçü idi;
Həzrəti Şis toxuculuq və hörücülüklə məşğul olmuşdur;
Həzrəti İdris iynəni ilk dəfə icad edən, onda dəlik açıb sap keçirən insan idi. Bu səbəbdən, o, dərzilərin və toxucuların ustadı hesab olunur;
Həzrəti Nuh dülgərliklə məşğul olmaqla yanaşı, dənizçilərin ilki sayılır;
Həzrəti Hud tacir idi. Bütün tacirlərin ustadı sayılır;
Həzrəti Saleh dəvəçiliklə məşğul idi. Sürülərlə dəvələri vardı. Saleh peyğəmbər dəvələrin südlərini satmaqla dolanışığını təmin edərdi;
Həzrəti İbrahim Kəbəni yenidən inşa etmişdir;
Həzrəti İsmayıl ovçu idi. Həm dənizdə, həm də quruda ovçuluqla məşğul olar, dolanışığını bununla təmin edərdi;
Həzrəti Lut tarixçi idi. Tarixdə ilk səyyah sayılır;
Həzrəti İshaq çoban idi;
Həzrəti Yaqub çobanlıq edib;
Həzrəti Yusif saatı icad edən şəxsdir. Müasir dillə desək, kənd təsərrüfatı idarəsini yaradan, eləcə də bolluq dövründə məhsulu anbarlarda yığıb saxlayan, qıtlıq vaxtı isə xalqa paylayan peyğəmbər idi. Habelə yuxuyozma elmi də məhz Yusif peyğəmbərin adı ilə bağlıdır;
Həzrəti Əyyub əkinçi idi;
Həzrəti Şueyb əkinçiliklə məşğul olmuşdur;
Həzrəti Musa çobanlıq etmiş və Həzrəti Şueyb peyğəmbərin qoyunlarını otarmışdır. Böyüyün yanında işləmək, ona qulluq etmək peyğəmbər peşələrindən idi;
Həzrəti Harun vəzir idi;
Həzrəti Davud dəmirçiliklə məşğul idi. Tarixdə ilk dəfə zireh düzəldən və intizamlı ordu quran komandandır;
Həzrəti Süleyman hökmdar olmaqla yanaşı, zənbil də düzəldərdi. Tarixdə ilk dəfə mis mədənini işlədən də Süleyman peyğəmbərdir;
Həzrəti Zülkifl peşəsi çörəkçilik idi;
Həzrəti İlyas peşəsi toxuculuq idi;
Həzrəti Yunus balıqçı idi. Dolanışığını balıq ovlayıb satmaqla təmin edərdi;
Həzrəti Üzeyir bağban idi. Meyvə ağaclarını ilk dəfə peyvənd edən, budama işini insanlara öyrədən insandır;
Həzrəti Loğman həkim idi. O, əczaçıların ustadı sayılır;
Həzrəti Zəkəriyyə dülgər idi;
Həzrəti İsa ovçuluq etmişdir. Bəzi mənbələrdə isə Həzrəti İsanın çobanlıq etdiyi də qeyd olunub;
Həzrəti Məhəmməd (Ona Allahın xeyir-duası və salamı olsun) kiçik yaşlarında çobanlıq etmiş, daha sonra isə ticarətlə məşğul olmuşdur.
| Baxılıb: 548 | Tarix: 
