Ana Səhifə » 2012 » May » 25 » Böyüklərimiz Hz. Əbu Bəkir, Hz. Ömər və Hz. Əli Allahdan nə istəmişdilər?
Böyüklərimiz Hz. Əbu Bəkir, Hz. Ömər və Hz. Əli Allahdan nə istəmişdilər?
09:18
Uca Allaha yaxın olan böyüklərimiz həm yalnız qaldıqları, həm də xalq arasında olduqları vaxtlarda daim Allahı xatırlayardılar. Onlar yalnız ehtiyac duyduqda deyil, hər an Uca Allaha yalvarır, dua edirdilər.
Böyüklərimiz olan səhabələr nemət bəxş edildikdə dualarını və tövbələrini daha da artırır, sıxıntı üz verdikdə dualarını səmaya ərz edirdilər. Onlar çətinə düşdükdə Yaradana yalvarıb, rahatlığa çıxdıqları zaman dualarını əsirgəyənlərdən deyildilər. Əgər siz onları dua etdikləri vaxt görsəydiniz, sanki cəhənnəmə atılacaqlarını zənn edərdiniz.
Onların Allaha yalvarıb-yaxarmalarına qulaq versəydiniz, bir qədər sonra edam kürsüsünə çıxacaq bir günahkarın etiraflarını eşitdiyinizi güman edər, göz yaşlarını görsəniz, sanki dünyada bütün günahları işlədiklərini zənn edərdiniz.
Böyük insanların namazlarında son nəfəsini verməzdən qabaq kəfənə bürünüb qəbrinə baxan bir insanın həyəcan və narahatlığını müşahidə edə bilərdiniz.
Onların səmaya yönəlmiş əllərini görsəydiniz "Sənin mərhəmətinə, etibarına və qapına sığınmışam, ey mərhəmətlilərin ən mərhəmətlisi!” - deyən bir kəsin halını müşahidə edər, öz dualarınızdan və tövbələrindən utanardınız.
Böyüklərimizin Allaha necə yalvarmalarına baxın və ibrət götürün:
Həzrəti Əbubəkr dua edərkən deyərdi:
"Allahım, mənə sarsılmaz bir iman bəxş et, məni imanımda yəqin qullardan qıl. Səndən sağlamlıq və xalis niyyət istəyirəm”.
Həzrəti Ömər Uca Yaradana əl açaraq demişdi:
"Ey Rəbbim, məni əməlisaleh bəndələrindən et. Mənə elə bir ixlas bəxş et ki, ibadətlərimdə və niyyətimdə Səndən başqasının payı olmasın. Allahım, bizi bağışla. Əgər şəhid olsam, öldürülməyimi ömründə bir dəfə namaz qılmış və ya bir dəfə imanla səcdə etmiş kəsə nəsib etmə ki, etdiyi səcdəni və qıldığı namazı irəli sürərək, qiyamət günü Sənin hüzurunda mənimlə mübahisə etməsin”.
Allah Həzrəti Ömərin duasını qəbul etdi. Bu ədalətli xəlifə namaz qılarkən bir məcusi (atəşpərəst) tərəfindən bıçaqlanaraq şəhid edildi.
Həzrəti Əli Allaha yalvarıb-yaxardığı zaman belə demişdi:
"Allahım, Sən bilirsən ki, günahlarım Sənə zərər verməz. Bilirəm ki, Sənin mənə mərhəmətlə davranmağın Sənin mərhəmətindən heç nəyi əskiltməz”.
Bilal Həbəşi dua etdikdə deyərdi:
"Allahım, günahlarımı bağışla. Xəstələndiyim günləri günahlarımın bağışlanması üçün üzr və "fidyə” qəbul et!”
Böyük səhabə Fədalə dua edərkən deyərdi: "Allahım, Səndən qədərimə razı olmağını və öldükdən sonra cənnətdə rahat yaşamaq istəyirəm. Sənin camalını görmək, Sənə qovuşmaq və bunun zövqünü dadmaq istəyirəm. Ey rəbbim, yolumu və istiqamətimi dəyişdirəcək sıxıntılardan və məni düz yoldan azdıracaq imtahanlardan Sənin mərhəmətinə sığınıram”.
Əbdürrəhman ibn Övf Allaha yalvardığı zaman deyərdi:
"Allahım, məni nəfsimin paxıllığından qoru. Çünki nəfsimin paxıllığından və acgözlüyündən qorunsam, nə oğurluq və zina edər, nə də qeyri günaha bulaşaram”.
Abdullah ibn Məsud belə dua edərdi:
"Ey rəbbim, Səndən şirkə bulaşmamış iman, bitməz-tükənməz cənnət nemətləri istəyirəm. Allahım, Səndən peyğəmbərin Məhəmmədə cənnətdə qonşu olmaq istəyirəm”.
Abdullah ibn Ömər belə yalvarardı:
"Allahım, məni dinin üzrə yaşat. Sənə və peyğəmbərinə itaət etməyi nəsib et. Ey rəbbim, məni Səni sevənlərdən, peyğəmbərlərini, mələklərini və əməlisaleh qullarını sevənlərdən qıl. Allahım, məni Uca zatına, mələklərinə, peyğəmbərlərinə və gözəl qullarına sevdirt, cənnətə aparan yolu mənim üçün asanlaşdır”.
Uca Allah Quranda belə buyurur:
"Mənə dua edin, Mən də sizin dualarınızı qəbul edim!” (əl-Mumin, 60).
P.S. Bəli, böyüklərimizin dualarında qorxu və narahatlıq, arzu-istək vardı. Bəs sizin dualarınız, narahatlıqlarınız, qorxularınız nədən ibarətdir? Heç bu barədə düşünübsünüzmü?