Qafqaz Müsəlmanları Idarəsinin (QMI) xətti ilə avtobusla Həcc
ziyarətində olanların bir qismi geri qayıdarkən dünən
Azərbaycan-Gürcüstan sərhədində maneə ilə üzləşib. Dünən bütün gün
ərzində hacıları “Qırmızı körpü”dəki sərhəd-buraxılış məntəqəsindən
buraxmayıblar. Bu barədə “Azadlıq”a səfərdən qayıdan Hacı Ramil
Bayramov məlumat verib. Bildirib ki, günorta saat 13.00
radələrindən iyirmiyə qədər avtobusu buraxılış məntəqəsində
saxlayıblar. Üç yüzə qədər zəvvarın dünən bütün günü soyuq havada
dayandığını deyən Hacı Ramilin sözlərinə görə, əvvəlcə bunun səbəbləri
barədə onlara heç nə deməyiblər. Yalnız sərhədçilər bildiriblər ki, baş
verənlərin onlarla heç bir əlaqəsi yoxdur. Problem gömrük işçilərilə
bağlıdır. Bir qədər də keçəndən sonra belə bir xəbər yayılıb ki,
zəvvarların buraxılmaması onların əşyaları arasında vəhhabiliyi təbliğ
edən qadağan olunmuş ədəbiyyatın tapılmasıyla bağlıdır. Ramil
Bayramovun sözlərinə görə, bunu ağızdan-ağıza eşitsələr də, gömrük
işçilərindən heç kəs onlara dəqiq bir söz deməyib. “Neçə saatdır
ki, insanlar soyuğun altında donur. Qadınların bir hissəsini buraxılış
məntəqəsinin yaxınlığındakı çayxanaya yerləşdirmişik. Qalanlar qalıblar
küçədə ayaq üstə. Bir neçə xarici ölkənin sərhədini asanlıqla keçmişik,
öz vətənimizdə bizim başımıza oyun gətirirlər. Sevinə-sevinə gəlirdik
ki, artıq vətənə çatmışıq, evimizə-eşiyimizə gedirik, imkan vermirlər.
Insanlar az qalırlar ağlasınlar. Əsəblər gərginləşib, bir neçə hacı ilə
buraxılış məntəqəsindəki əsgərlər arasında insident oldu. Onlar da
deyir ki, neyləyək, bizim gömrük belədir”, - deyə Ramil Bayramov
insanların narazılığını çatdırıb. Qadağan olunmuş ədəbiyyat dedikdə
söhbətin konkret hansı kitablardan getdiyini bilməyən Hacı Ramil onu da
bildirdi ki, səfər zamanı onlara kitablar hədiyyə olunub: “Səudiyyə
Ərəbistanında şeyx sərhədi var. Oradan keçəndə zəvvarlara hədiyyə
olaraq bir Quran, bir ədəd də başqa bir kitab verilir. Bizim də hər
birimizə verilib. O kitab da ərəb dilindədir. Biz nə bilək ki, orada nə
yazılıb. Özü də biz bir neçə ölkənin sərhədini keçmişik, amma heç yerdə
saxlamayıblar”. Qafqaz Müsəlmanları Idarəsindən isə APA-ya bu
barədə məlumatsız olduqlarını və məsələni araşdıracaqlarını
bildiriblər. Qurumdan, həmçinin sərhəddə yoxlamaların keçirilməsini
normal prosedur olduğu qeyd olunub: “Hər bir ölkənin sərhədində bu cür
yoxlamalar aparılır və burada qeyri-adi heç nə yoxdur”. Aytən Məmmədova
| Baxılıb: 1119 | Tarix: 
