Ana Səhifə » 2008»Noyabr»30 » “BƏZİ ZƏVVARLAR HƏCCƏ YOX, SANKİ İSTİRAHƏTƏ GƏLDİYİNİ DÜŞÜNÜR”
“BƏZİ ZƏVVARLAR HƏCCƏ YOX, SANKİ İSTİRAHƏTƏ GƏLDİYİNİ DÜŞÜNÜR”
13:47
“Karvan-D” şirkətinin xətti ilə Həcc ziyarətinə yollanan azərbaycanlı
zəvvarlar Mədinədə küçələrdə gecələyir. Bu məlumatı sözügedən şirkətin
xəttilə avtobusla yollanan və hazırda Mədinə şəhərində olan zəvvarlar
APA-ya telefonla bildiriblər.
Zəvvarlar qida və gecələməklə bağlı problemlərinin olduğunu deyiblər:
“Mədinədə bizim üçün çox pis, lap aşağı səviyyəli otaqlar ayırıblar. O
da zəvvarların sayından qat-qat azdır. Buna görə də 10-15 nəfəri bir
otaqda qalmağa dəvət edirlər. İndi burda pul toplayan zəvvarlar
gecələmək üçün qaraj kirayələyir. Bəziləri isə özlərinə məscidlərin
həyətində yer edirlər”. Zəvvarlar
onu da deyib ki, ayrılmış otellər çirkli və natəmiz olduğundan, bir çox
otaqlarda pəncərə və qapılar olmadığından, həm də bir neçə nəfərə bir
otaq ayrıldığından dindarlar bu yerlərdən imtina edərək küçədə,
avtobusda və qarajlarda yatmağa üstünlük verir. Onlar bildiriblər ki,
“Karvan-D” şirkətinin qrupdakı rəhbəri olan Mirmehdi adlı şəxs
narazılıqlara cavab olaraq indiki halda bundan artığının mümkün
olmadığını deyib. Dünən məsələ ilə bağlı “Karvan-D” ziyarət
agentliyinin nümayəndələri ilə əlaqə saxladıq. Şirkətin nümayəndəsi,
hazırda Mədinə şəhərində olan qalmaqallı qrupun rəhbəri Mirmehdi
Dərafarin bizimlə söhbət zamanı yayılan məlumatın həqiqətəuyğun
olmadığını bildirdi. Mədinədə ciddi problemlərlə üzləşmədiklərini deyən
qrup rəhbərinin sözlərinə görə, bəzi zəvvarlar sadəcə daha artıq
komfort tələb edirlər və hazırda mövcud olan şərtlərdən narazıdırlar:
“Yaxşı bilirsiniz ki, Səudiyyə Ərəbistanı sərt qanunları ilə seçilən
dövlətdir. Burada kimsə küçədə gecələyə bilməz, ən azı polis onu tutub
aparar. Bizim qrupda olan zəvvarların narazılığına gəlincə isə onu
deyim ki, burada bəzi insanlar ziyarətə deyil, sanki istirahətə
gəldiklərini sanır. Bizdən daha artıq komfort tələb edirlər. Biz isə
onlara başa salmağa çalışırıq ki, Mədinə kiçik şəhərdir və Həcc
mövsümündə eyni anda bura neçə milyon insan gəlir. Bu səbəbdən bütün
otellər yüksək səviyyəli olmur”. Müsahibimizin sözlərinə görə,
onların kirayələdikləri otaqlar normaldır: “4 və 6 nəfərlik nömrələr
kirayələmişik. İki ayrı otaqdan ibarət bir neçə nömrə var ki, onlarda
7-8 zəvvar qalır. Yenə deyirəm, bunlar iki otaq olur. Amma kimsə
bayırda qalmayıb və bu, mümkün deyil”. M.Dərafarin artıq narazılığın
aradan qalxdığını dedi: “Narazılıq edənlərdən bəziləri gəlib üzrxahlıq
etdilər. Hətta bura Azərbaycan səfirliyinin nümayəndələri də
gəlmişdilər. Onlar da baxıb təsdiqlədilər ki, şərait şikayət üçün əsas
verə bilməz. Amma bizi narahat edən odur ki, belə məlumatlar
Azərbaycanda tez yayılır və camaat arasında narahatlığa səbəb olur.
Çünki minlərlə insan Həcc ziyarətinə yola düşüb və onların taleyi hər
kəsi narahat edir. Bura da çoxsaylı zənglər olur”.
Bölmə: Ölkə Xəbərləri | Əlavə etdi: Selef
| Baxılıb: 958 | Tarix: 22.11.2024
| Baxılıb: 958 | Tarix: 
