Lent.az-ın əməkdaşı xəbər verir ki, yanvarın 6-da axşam saatlarından başlayaraq, paytaxtın mərkəzi hissələrindən 20-30 nəfərlik, əsasən gənclərdən ibarət çoxsaylı insan qrupları Nardaran kəndi istiqamətində piyada yola çıxıblar. Aşura günüdə Kərbəlada şəhid olanları yad etmək üçün keçirilən ənənəvi mərasim paytaxtda fəal şiə mərkəzi sayılan Nardaran kəndində saat 20 radələrində başlayıb.
Lent.az-ın Nardarana ezam olunmuş əməkdaşının verdiyi məlumata görə, kənddəki “Hüseyniyyə” məscidinin həyətinə mərasim başlanan vaxt minlərlə insan toplaşıb. Qafqaz Müsəlmanları İdarəsi Qazılar Şurasının xəbərdarlığına baxmayaraq, mərasim iştirakçıları, əsasən də gənc və yeniyetmə oğlanlar, məscidin içərisində sinə döyür, zəncir vururlar. Onların əksəriyyəti üzərinə ərəb hərfləri ilə yazılar yazılmış qara rəngli paltarlar geyinib, alınlarına qara parçalar bağlanıb. Məscidin qapısında isə mərasimə gələnlərə təsisçisi Mehman Müctəba kimi göstərilən, Azərbaycanda nəşr olunan “İslam həqiqətləri” qəzeti paylanıb. 29 fevral-06 mart 2008-ci il tarixli qəzetdə dini məzmunlu yazılarla yanaşı, siyasi yazılar da yer alıb.
Aşura mərasimi zamanı məsciddə siyasi mövzuda bəyanatlar, şüarlar səslənməyib.
“Hüseyniyyə” məscidində 4 nəfər mikrofonla mərsiyə deyib. Onlardan biri əmmaməli və əbalı olub. Lent.az-ın əməkdaşı mərsiyə deyənləri çəkmək istəyərkən buna etiraz edilib.
Yaxınlıqdakı “Rəhimə xanım” ziyarətgahında isə mərsiyə səsləri gəlsə də, insanlar bura daha çox ziyarət və nəzir vermək məqsədilə gəlib. Burada zəncir vurulması müşahidə olunmayıb.
Mərasim bu gün səhərə qədər davam edib. Kəndə gedən yolda polis postları da səhərə qədər fəaliyyət göstərib.
Qeyd edək ki, Hicri tarixlə 61-ci ilin məhərrəm ayının 10-da (miladi tarixlə 680-ci il) Kərbəla çölündə Yezid ibn Müaviyənin qoşunları ilə qeyri-bərabər döyüşdə Məhəmməd peyğəmbərin nəvəsi İmam Hüseyn ibn Əli və daha 71 nəfər silahdaşı şəhid olub.
inanın ki onlar heç nə etdiklərini bilmirlər.Bizim yanımızda danışırlar ki gedək görək nə var nə yox maraq üçün.dünən bir yaşlı kişi gəlmişdi yanıma.(iş yerimə) deyir indiki cavanlar lap ağın çixardıb.Nardaran pirində bütün günü danışıb,gülür gəlib gedən qadınlara baxırlar.
| Baxılıb: 1409 | Tarix: 
