Xatırladaq
ki, Türkiyənin Azərbaycandakı səfirliyinin dini işlər üzrə müşaviri
Müzəffər Şahin APA-ya açıqlamasında camenin açılmaq ehtimalının
olmadığını söyləyib. Onun sözlərinə görə, hazırda ibadət etməyə imkan
olsa da, məscid açılmayıb. Təmir adı ilə bağlanan ibadət ocağında bu
günə kimi heç bir işin getməməsi onun sökülmə ehtimalını daha da
artırıb. Məsələ ilə bağlı «Səhidlər məscidi»nə baş çəkdik. Şəhidlər
Xiyabanının yanında yerləşən məscidin qapıları bağlı idi. Üstəlik,
cameyə aid məişət əşyaları çölə çıxarılmışdı. Türkiyənin Azərbaycandakı
səfirliyinin Dini İşlər üzrə Müşavirliyinin qapıları da bağlı idi.
Məscidin rəhbərliyi ilə əlaqə saxlamağa çalışsaq da, cəhdlərimiz heç
cür alınmadı. Bütün bunlar məscidin bağlanması ilə bağlı fikirlərimizi
təsdiqlədi. Xüsusilə
qeyd edək ki, bizdə olan son məlumatlara görə, məscidin bağlanmasına
səbəb yanında tikilən otel-restoran kompleksidir. Belə ki, ingilis
şirkəti tərəfindən tikilən bu otelə xaricdən qonaqların gələcəyi
nəzərdə tutulub və səsləndirilən azanın onlara mane olacağı, narahatlıq
doğuracağı güman edilib. Tikintini aparan məsul şəxslərlə də görüşüb
onların məsələyə münasibətlərini öyrənməyə çalışdıq. Tikinti icraçısı
İran vətəndaşı olan Əhməd bəy bildirdi ki, camenin fəaliyyətinin
dayanmasının onlara heç bir əlaqəsi yoxdur: «Bizim
şirkət hazırda burda, Azərbaycanda ən böyük otel-restoran kompleksinin
inşası ilə məşğuldur. Məscidin söküləcəyi haqqında bizdə heç bir
məlumat yoxdur və onun sökülməsinə biz səbəbkar deyilik. Nə də ki,
tərəfimizdən elə bir iddia olmayıb. Bir çox xarici ölkələrdə otellərin,
restoranların yanında məscidlər fəaliyyət göstərir. Səsləndirilən
azanın isə onların fəaliyyətinə heç bir təsiri olmur». Məscidin
qapısı bağlı olsa da, bura ibadət etməyə gələnlər xeyli sayda idi. Kimi
məscidin həyətində, kimi isə ağacların arxasında namazını qılırdı.
Türkiyə vətəndaşı Hüsnü Bektaş bizimlə söhbətində «Şəhidlər» məscidinin
bağlanılmasını pislədi. Onun sözlərinə görə, bu mübarək ayda
müsəlmanların üzünə qapatmaq əsl Allahsızlıqdır: «Hər gün
telekanallarda Azərbaycanın tolerant ölkə olduğunu bar-bar bağırırlar.
Bu yaxınlarda Bakını "İslam mədəniyyətinin paytaxtı" adını verdilər.
Necə olur ki, islam mədəniyyəti paytaxtında bir dənə məscid fəaliyyət
göstərmir?" Qəzəbli şəkildə danışan türk vətəndaşı məscidin
həyətində belə rahat namaz qıla bilmədiklərini söylədi: «O gün də namaz
qılmağa gəlmişdik. Məscid bağlı olduğundan, ibadətimizi həyətdə etməyə
məcbur olduq. İki polis əməkdaşı bizə yaxınlaşaraq burdan getməyimizi
bildirdilər. Onlara etiraz etdikdə bizə çox sərt şəkildə cavab
verdilər». Başqa
bir həmsöhbətim türk tələbəsi isə məscidin aylardır təmir adı ilə
bağlanıldığını və bu günə kimi heç bir təmir-tikinti işinin getmədiyini
söylədi: «Əvvəla, bu məscidin təmirə ehtiyacı yox idi. Neçə aydır ki,
məscidi bu adla bağlayıblar. Ən böyük sürpriz isə bizə bu gün etdilər.
Öyrəndik ki, artıq məscid bağlandı». Nəzərinizə çatdıraq ki,
məscidin bağlanmasına türk tələbələrlə yanaşı, azərbaycanlı tələbələr
də münasibət bildirdilər. Onlar son günlər məscidlərə qarşı böyük bir
kompaniya aparıldığını və ard-arda ibadət evlərinin bağladıqlarını
söylədilər: «İndi paytaxtda, demək olar, bir-iki məscid fəaliyyət
göstərir. Yerdə qalanının bağlayıblar. Məscidlərə qarşı total
hücumların arxasında hansı maraqlar gizlənir, bunu bilmirik». Xatırladaq
ki, Türkiyənin Azərbaycandakı Səfirliyinin Dini işlər üzrə müşavirinin
müavini Bayram Altıntaş «Yeni Müsavat»a açıqlamasında bildirmişdi ki,
came Ramazan bayramına kimi istifadəyə veriləcək: «Aprelin 28-dən
məscidimiz camaatın xidmətinə bağlanıb. Təmir barəsində isə onu deyə
bilərəm ki, məscidin kiçik boya işindən başqa təmirə ehtiyacı yox idi.
Yəqin bundan sonra məscid bütövlükdə təmir olunacaq». Xatırladaq ki,
hazırda Azərbaycanda 1750 məscid var. Onların 100-ə yaxını fəaliyyət
göstərir. «Türkiyə Diyanət İşləri Vaqfı» tərəfindən tikilən «Şəhidlər
məscidi» 1993-cü ildə istifadəyə verilib. Məscid aprelin 26-da günorta
namazından sonra təmir adı ilə bağlanılıb. Hətta terrorçu Fərda
Qədirovun əvvəlcə bu məsciddə terror törədəcəyi barədə versiyalar irəli
sürülmüşdü. Məscidin təmir ilə əlaqədar bağlanıldığı söylənilsə də, üç
aya yaxındır ki, məsciddə heç bir təmir-tikinti işləri aparılmayıb.
Fərahim İLQAROĞLU
Bölmə: Ölkə Xəbərləri | Əlavə etdi: Selef
| Baxılıb: 947 | Tarix: 14.05.2024
«Bizim
şirkət hazırda burda, Azərbaycanda ən böyük otel-restoran kompleksinin
inşası ilə məşğuldur. Məscidin söküləcəyi haqqında bizdə heç bir
məlumat yoxdur və onun sökülməsinə biz səbəbkar deyilik. Nə də ki,
tərəfimizdən elə bir iddia olmayıb. Bir çox xarici ölkələrdə otellərin,
restoranların yanında məscidlər fəaliyyət göstərir. Səsləndirilən
azanın isə onların fəaliyyətinə heç bir təsiri olmur».
| Baxılıb: 947 | Tarix: 
